सरकारी विदामा पुनर्विचार गर्नुपर्ने प्रधानमन्त्री प्रचण्डको भनाइ

काठमाडौं । प्रधानमन्त्री पुष्पकमल दाहाल प्रचण्डले सरकारी बिदा धेरै भएकाले सेवा प्रवाह प्रभावित भएको र त्यसमा पुनर्विचार आवश्यक भएको बताउनुभएको छ ।
 
आज बिहान प्रधानमन्त्री तथा मन्त्रिपरिषद्को कार्यालयमा प्रजातन्त्र दिवस मूल समारोह समितिको बैठकमा प्रधानमन्त्री प्रचण्डले बिदामा पुनर्विचार आवश्यक भएको बताउनुभयो 

हाम्रा सरकारी बिदाहरू धेरै भए,  यसले जनताका काम गर्ने समय कम भएको छ, सेवा प्रवाहमा समस्या देखिएको छ, प्रधानमन्त्री प्रचण्डले भन्नुभयो । 

प्रधानमन्त्रीले प्रजातन्त्र दिवस, लोकतन्त्र दिवस, गणतन्त्र दिवसमा एकै प्रकृतिका कार्यक्रम गरिँदै आएकाले त्यसबारे समेत थप छलफल आवश्यक भएको पनि बताउनुभयो ।  सबै कार्यक्रमको प्रकृती एकै किसिमको भएको र त्यसलाइ परिवर्तन गर्न आवश्यक रहेको उहाँको भनाइ रहेको थियो । 

बैठकले आगामी फागुन ७ गते विविध कार्यक्रमका साथ प्रजातन्त्र दिवस मनाउने निर्णय पनि गरेको छ । त्यसका लागि प्रधानमन्त्रीको संयोजकत्वमा मूल समारोह आयोजक समितिसमेत गठन गरिएको छ ।